【遊戲路邊社】《芒亨》掀撲 Game潮 中港日齊玩搶櫈仔

3iGAME 於 30/01/2018 發表 收藏文章
《Monster Hunter:World 》一出,真係帶返起成個市場嘅買氣,好耐唔見嘅排隊買Game潮又再出現,一眾老闆們當然開心到跳起Yeah啦!就連平時好少點到遊戲呢瓣嘅先達都有人高價收Game!咩人要?咁九成九都係深圳河以北嘅玩家啦,唔通你同我咩!


講開外流,今次《芒亨》真係創本地業界先河,首次有日本行家專登飛過嚟香港掃門口貨返日本賣,往日就只有香港人去日本掃人哋門口返嚟賣,今次呢躺風水輪流轉嘅最大原因係日本都唔夠貨賣!而今次嚮香港賣嘅亞洲版本身都有日文,所以擺返嚮日本賣都冇問題。佢哋真係乜都要,特別版機啦、連Figure嘅收藏版啦、普通版啦通通唔放過,仲要係不問價追,豪氣度可跟深圳河以北人士媲美!


據知本地方面貨源未見吃緊,不過想佢跌價就未必咁快。而家臨渴先掘井搵 Pro 機嘅就俾定心理準備你,有關方面話 Pro機要過晒農曆新年後先有大貨派,要買特別版就更加冇可能有平貨買,你諗下喇,日本、深圳河以北、東南亞同埋本地玩家都一齊搶,點可能落到價?據知唔少人退而求其次搵Slim 機,搞到 Slim 機都開始唔夠貨賣,開始漲價喇陰功!仲有就係 PSN Plus 會員卡都搶,12個月冇咩?3個月都殺!所以話你唔好以為你唔玩《芒亨》就唔關你事?錯晒啦大俠!


轉載自3iGAME

留言


請按此登錄後留言。未成為會員? 立即註冊
    快捷鍵:←
    快捷鍵:→