點止紙皮咁簡單?Nintendo Labo玩法超乎你所想!

I am Switch-er 於 05/02/2018 發表 收藏文章
一嚟就利申返先,小編我梗係無咁有錢飛去紐約試玩Labo,以下寫嘅嘢都係睇片所得,所以有錯有漏麻煩大家提一提,小編會改返。入正題喇,話說上個月任天堂就發表咗Nintendo Switch嘅新玩法Nintendo Labo(詳見:《[邊個話紙皮係垃圾] NS新玩法,將電子遊戲帶返出實體,Nintendo Labo 4/20推出》),評價都幾兩極,插嗰邊就主要係話紙皮都賣成四五百(咁仲有隻game嘅),讚嗰邊就主要係話其實張卡紙只係好似Lego張說明書咁,只係建議玩法,實際玩法可以無限延伸。


之前剩係望住條宣傳片同幾幅圖,大家都只係喺度亂吹咁款,不過而家唔使再估估下咁,因為Labo第一場嘅試玩上個禮拜就喺紐約舉行,任天堂果然無令大家失望!首先講宣傳片已經講哂玩法嘅Fishing Rod,支魚桿嘅結構比想像中複雜,望落都幾紮實。隻game就真係好正路嘅釣魚,當有魚上釣魚桿就會震,咁如果我唔砌支魚桿,就咁將條"魚絲"綁住Joy-Con,就咁扯個Joy-Con又得唔得呢ww

▼Building a Nintendo Labo Toy-Con Fishing Rod

RC Car望落平平無奇,一開始大家都以為咪又係普通遙控車,不過原來任天堂真係有啲嘢收收埋埋。首先,RC Car本身喺個Package裡面已經係有兩sets,所以好合理地一部機係一次過可以控兩架RC Car。另外,大家一直都忽視咗右Joy-Con個IR鏡頭,連小編以為係無聊設計,除咗喺1-2 Switch咬熱狗用過之外都無用,喺Labo佢有用喇!RC Car除咗可以用個screen就咁控之外,玩家可以利用右Joy-Con嘅IR鏡頭令架"車"跟住熱源去行,個IR鏡頭仲可以用嚟影紅外線熱像。

▼Building a Nintendo Labo Toy-Con RC Car

Motorbike係小編喺一開始公佈嗰陣就最期待嘅,不過本身同Fishing Rod一樣,玩法簡單直接,所以驚喜就欠奉。如果真係覺得Motorbike無乜驚喜,Piano可以話係最無特別咁樣…… 可能係Labo系列結構最複雜嘅Robot,小編暫時未搵到砌嘅片,剩係搵到試玩片,暫時睇似乎有啲難控制,動作有啲過份生硬,轉返第一身視覺會好啲。至於一直都無提及任何玩法嘅House幾得意,有三樣嘢玩,分別係開水浸咗間屋、開Portal吸走哂間屋啲嘢、同一個礦車被炸彈嘅小遊戲。

▼Nintendo Labo: Hands-On

以為咁就完,咁你就錯哂喇,同場仲展示咗個唔俾影嘅功能 Toy-Con Garage!據外媒報導Toy-Con Garage係俾玩家自己開發新玩法,透過Node-bases System用if同then就可以完成完全屬於自己嘅創作。甚至乎Joy-Con嘅所有操作都可以利用呢個功能重新編寫,例如可以set撳右Joy-Con個A掣,左Joy-Con會震。會場展示咗利用呢個功能將Motorbike嘅Labo組件玩RC Car,仲有個係用呢個功能加張普通嘅卡紙DIY咗個結他。


就咁睇個試玩會都見到Labo個玩法真係可以無限延伸,就算唔計Toy-Con Garage呢個功能,剩係之前條宣傳片都仲起碼8款Toy-Con未公佈,睇嚟任天堂剩係用Switch都夠玩5-6年!

loading

loading

更多試玩:

留言


請按此登錄後留言。未成為會員? 立即註冊
    快捷鍵:←
    快捷鍵:→