NS可以再戰十年?唔好搞到好似Wii U咁喎

I am Switch-er 於 06/02/2018 發表 收藏文章
任天堂作為一間老牌遊戲公司,現今遊戲主機廠三巨頭之一,一直以嚟經營手提機方面都好有心得,Gameboy系列足足玩咗13年,唔係Sony部PSP咁勁我諗佢都唔會出NDS。點知NDS系列一出又8年,雖然去到NDSi已經賣得麻麻地,不過NDS系列總計真係好受歡迎,甚至對手都差唔多皮已收都仲賣到。好喇,今次唔係對手勁喇,係手遊強勢掘起,咁順勢食住3D嘅潮流出3DS,玩到市場上大部份3D產品都已經消失哂,佢都仲賣緊,咁又8年。


手提機就撈得好掂,但家用機就完全調返轉,自N64之後無次唔係衰收尾。又或者咁講,家用機嘅對手本身都更新機種都更新得快,成個軍備競賽咁,本來家用機嘅市場就無得好似手提機咁,少修少補慢慢更新。本來Wii開個頭真係開得好靚,但Wii U嘅不思進取就搞到任天堂沉寂咗好幾年。


不過任天堂對NS嘅處理都係想呢個系列可玩返起碼7年,任天堂總裁君島達己表示NS唔會好似對上幾部家用機咁得5至6年嘅生命週期,NS會last 7至10年。認真講,呢個系列last 10年無問題,但如果啲升級版又係玩返少修少補咁就又會瀨嘢架喇。當對手已經行緊1080/60p同4K/30p,而家NS只係行緊720/30p同1080/30p,當然遊戲性絕對比畫質重要,但部機行唔到更高畫質同時亦都代表呢個係你部機性能嘅局限。毫無疑問,任天堂係自家遊戲真係好高質,但第三廠嘅支持都好重要,呢個正正就係Wii U嘅死因,其實技術唔係冇,手機都出到6吋、全面屏、4K,NS一樣可以做到。希望任天堂今次唔好再重蹈覆轍,不過見到任天常都肯出手遊,而且又諗到真係玩法無限延伸嘅Labo,活用對手部機冇嘅特色,暫時睇都樂觀嘅。

留言


請按此登錄後留言。未成為會員? 立即註冊
    快捷鍵:←
    快捷鍵:→